Հայաստանի Հանրապետության ինտերնետով ծանուցման պաշտոնական կայք

ՈՐՈՇՈԻՄ
«22» փետրվարի 2024 թ. № Հ/37-2024-Դ/06-Ա
ՀՀ, ԳԵՂԱՐՔՈՒՆԻՔԻ ՄԱՐԶ, ՔԱՂԱՔ ԳԱՎԱՌ, ՀԵՆՐԻԿ ԱԲՐԱՀԱՄՅԱՆ ԹԻՎ 7 ՀԱՍՑԵՈՒՄ ԳՏՆՎՈՂ ԲԵՆԶԱԼՑԱԿԱՅԱՆԻ ՇԱՀԱԳՈՐԾՈՒՄՆ ԱՄԲՈՂՋՈՒԹՅԱՄԲ ԴԱԴԱՐԵՑՆԵԼՈՒ ՄԱՍԻՆ

Հայաստանի Հանրապետության քաղաքաշինության, տեխնիկական և հրդեհային անվտանգության տեսչական մարմնի (այսուհետ՝ Տեսչական մարմին) ղեկավար Գարեգին Խաչատրյանս, ուսումնասիրելով Տեսչական մարմնի մասնագետների կողմից 2024 թվականի փետրվարի 15-ին կազմված թիվ Հ/37-2024-Ա-18/1 արձանագրությունը և վարչական վարույթի (այսուհետ՝ Վարույթ) նյութերը՝
ՊԱՐԶԵՑԻ
ԱՐՍԵՆ ՍԵՐՅՈԺԱՅԻ ՀԱՅՐԱՊԵՏՅԱՆԻ անհատ ձեռնարկատիրոջ (ՀՎՀՀ՝ 74321388, այսուհետ նաև՝ Ընկերություն) կողմից ՀՀ, Գեղարքունիքի մարզ, քաղաք Գավառ, Հենրիկ Աբրահամյան թիվ 7 հասցեում շահագործվում է արտադրական վտանգավոր օբյեկտ՝ բենզալցակայան։
Տեսչական մարմնի ղեկավարի 2024 թվականի փետրվարի 13-ի թիվ Հ/37-2024-Ա հանձնարարագրի հիման վրա Տեսչական մարմնի մասնագետների կողմից 2024 թվականի փետրվարի 15-ին հրդեհատեխնիկական հետազոտություն է իրականացվել Ընկերության վերոնշյալ գործունեության հասցեում։
Հետազոտության արդյունքում 2024 թվականի փետրվարի 15-ին կազմված թիվ Հ/37-2024-Ա-18/1 արձանագրության համաձայն՝ Ընկերության վերոնշյալ գործունեության հասցեում հայտնաբերվել և արձանագրվել են հրդեհային անվտանգության նորմատիվ փաստաթղթերի պահանջների հետևյալ խախտումները․
1. Հեղուկ վառելիքի տարողություններով բենզալցակայանից մինչև այլ շենքերի և շինությունների միջև պահանջվող նվազագույն միջտարածությունները պահպանված չեն (Խախտվել են Հայաստանի Հանրապետության քաղաքաշինության կոմիտեի նախագահի ՀՀՇՆ 30-01-2023 «Քաղաքաշինություն. քաղաքային և գյուղական բնակավայրերի հատակագծում և կառուցապատում» Հայաստանի Հանրապետության շինարարական նորմերը հաստատելու և Հայաստանի Հանրապետության քաղաքաշինության նախարարի 2014 թվականի հոկտեմբերի 14-ի N 263-Ն հրամանն ուժը կորցրած ճանաչելու մասին 2023թ. մայիսի 22-ի N 04-Ն հրամանով հաստատված «ՀՀՇՆ 30-01-2023 «Քաղաքաշինություն. Քաղաքային և գյուղական բնակավայրերի հատակագծում և կառուցապատում» Հայաստանի Հանրապետության շինարարական նորմերը» Հավելվածի այսուհետ՝ ՀՀՇՆ 30-01-2023 374-րդ կետի պահանջները)։
2. Բենզալցակայանի տարածքը փողոցների և ճանապարհների երթևեկելի մասից տարանջատված չէ անվտանգության կղզյակով, որի լայնությունը սահմանվում է մայթի տեղադրման պայմանից՝ նվազագույնը 1.5 մ լայնությամբ (Խախտվել են ՀՀՇՆ 30-01-2023, 373-րդ կետի պահանջները)։
3. Բենզալցակայանի տարողությունները տեղադրված են վերգետնյա, մինչդեռ բնակավայրերում տարողությունները պետք է նախատեսել միայն ստորգետնյա (ՀՀՇՆ 30-01-2023 370-րդ կետի պահանջները)։
4. Հրդեհավտանգ հիմնատարրերով տանիքների վրայով անցկացված են օդային էլեկտրահաղորդման գծեր և արտաքին էլեկտրագծեր (խախտվել են ՀՀ տարածքային կառավարման և արտակարգ իրավիճակների նախարարի 2015 թվականի հունիսի 18-ի «Հրդեհային անվտանության կանոնները հաստատելու և Հայաստանի Հանրապետության արտակարգ իրավիճակների նախարարի 2012 թվականի հուլիսի 26-ի N 263-Ն հրամանն ուժը կորցրած ճանաչելու մասին» թիվ 595-Ն հրամանի (այսուհետ՝ ՀԱԿ) 47-րդ կետի պահանջերը)։
5. Բենզալցակայանի էլեկտրական սարքավորումները համալրված չեն հողանցման համակարգով Խախտվել են ՀԱԿ 211-րդ կետի պահանջները։
6. Հակահրդեհային ինքնաշխատ համակարգից հրդեհի տագնապի ազդանշանը չի փոխանցվում լիազոր մարմնին Խախտվել են ՀԱԿ 81-րդ կետի պահանջները։
«Հրդեհային անվտանգության մասին» օրենքը սահմանում է Հայաստանի Հանրապետությունում հրդեհային անվտանգության ապահովման իրավական, տնտեսական և կազմակերպական հիմունքները:
«Հրդեհային անվտանգության մասին» օրենքի 3-րդ հոդվածում բացահայտված են նույն օրենքում օգտագործվող հիմնական հասկացությունները, որի համաձայն՝ հրդեհային անվտանգությունն` հրդեհներից անձի, գույքի, հասարակության և պետության պաշտպանվածություն.
Հրդեհային անվտանգության պահանջներ` Հայաստանի Հանրապետության օրենքներով և այլ իրավական ակտերով սահմանված` հրդեհային անվտանգության ապահովման ուղղությամբ սոցիալական և տեխնիկական բնույթի հատուկ պայմաններ.
«Հրդեհային անվտանգության մասին» օրենքի 4-րդ հոդվածի «ա» կետի համաձայն՝ բնակչության, բնակավայրերի և օբյեկտների հրդեհային անվտանգությունն ապահովվում է` պետական կառավարման և տեղական ինքնակառավարման մարմինների, կազմակերպությունների, պաշտոնատար անձանց և քաղաքացիների կողմից Հայաստանի Հանրապետության օրենսդրությամբ սահմանված, ինչպես նաև նորմատիվ փաստաթղթերով նախատեսված հրդեհային անվտանգության պահանջների պարտադիր կատարմամբ.
«Հրդեհային անվտանգության մասին» օրենքի 8-րդ հոդվածի համաձայն՝ հակահրդեհային նորմատիվ փաստաթղթերը (տեխնիկական կանոնակարգերը), ինչպես նաև հրդեհային անվտանգության պահանջները սահմանող ստանդարտները պարտադիր են բնակավայրերի, շենքերի և շինությունների նախագծման, կառուցման և շահագործման, հիմնանորոգման և վերակառուցման, ինչպես նաև սարքավորումների արտադրության և շահագործման ժամանակ:
«Հրդեհային անվտանգության մասին» օրենքի 20-րդ հոդվածի 1-ին մասի համաձայն՝ պետական հրդեհային հսկողությունը և վերահսկողությունն իրականացնում է տեսչական մարմինը՝ հրդեհային անվտանգության ոլորտին առնչվող նորմատիվ իրավական ակտերի և փաստաթղթերի (այդ թվում՝ նորմատիվատեխնիկական) պահանջների կատարումն ապահովելու, դրանց խախտումները կանխելու կամ բացահայտելու, ինչպես նաև հետևանքները վերացնելու նպատակով:
Նույն հոդվածի 2-րդ մասի 6-րդ կետի համաձայն՝ Տեսչական մարմինը պետական կառավարման, տարածքային կառավարման և տեղական ինքնակառավարման մարմինների, կազմակերպությունների, ինչպես նաև պաշտոնատար անձանց և քաղաքացիների կողմից հրդեհային անվտանգության ոլորտին առնչվող նորմատիվ իրավական ակտերի և փաստաթղթերի (այդ թվում՝ նորմատիվատեխնիկական) պահանջների կատարման նկատմամբ պետական հրդեհային հսկողություն և վերահսկողություն իրականացնելիս լիազորված է՝
հրդեհային անվտանգության ոլորտին առնչվող նորմատիվ իրավական ակտերի և փաստաթղթերի (այդ թվում՝ նորմատիվատեխնիկական) պահանջների այն խախտումների դեպքում, որոնք անմիջականորեն և ուղղակի սպառնալիք են ստեղծում հրդեհների առաջացման և մարդկանց անվտանգության համար՝
ա. ամբողջովին կամ մասնակիորեն դադարեցնելու կազմակերպությունների, արտադրական տեղամասերի, առանձին ագրեգատների աշխատանքը,
բ. ամբողջովին կամ մասնակիորեն դադարեցնելու շենքերի, շինությունների շինարարության, վերակառուցման, վերականգնման, ուժեղացման, արդիականացման աշխատանքները,
գ. ամբողջովին կամ մասնակիորեն դադարեցնելու շենքերի, շինությունների և այլ օբյեկտների շահագործումը.
Հիմնավորում վարչական ակտի անհապաղ ընդունման, ելնելով հանրային շահից՝ դրա անհապաղ կատարման վերաբերյալ։
Վերը նշված իրավական նորմերի վերլուծության արդյունքում հարկ է արձանագրել, որ պետության կողմից մի շարք նորմատիվ իրավական ակտերով սահմանվել են հրդեհային անվտանգության պարտադիր ապահովման պահանջներ, որոնք ուղղված են տվյալ ոլորտում պետության ռազմավարության սկզբունքների և դրանց իրագործման մեխանիզմների սահմանմանը և, ի թիվս այլնի, բնակչության պաշտպանությանը:
Հրդեհային անվտանգության պահանջները՝ նորմերի, կանոնների, պայմանների, արգելքների, սահմանափակումների և կատարման համար պարտադիր այլ պահանջների ամբողջությունն է, որոնք պետք է համապատասխանեն օրենսդրությամբ այդ օբյեկտների համար սահմանված նորմերի պահանջներին: Վերոնշյալ պահանջների կատարումը ինքնանպատակ չէ և միտված է կանխելու և/կամ նվազեցնելու հրդեհի և/կամ պայթյունի առաջացման ռիսկի գործոնը, ապահովելու առողջության համար անվտանգ պայմաններ` աշխատողների կամ նշված շենք-շինություններում աշխատանք կատարողների, տարածքում գտնվող սպառողների և այլ մարդկանց համար, ինչպես նաև ապահովելու նորմատիվ պահանջների խախտումների դեպքում հնարավոր բացասական հետևանքներից անձի, գույքի, հասարակության և պետության պաշտպանվածությանը։
Հակառակ դեպքում, երբ շենքերն ու շինությունները կամ այլ օբյեկտները չեն համապատասխանում հրդեհային անվտանգության ոլորտի օրենսդրության պահանջներին, ապա հրդեհային անվտանգության ապահովման բնագավառում վերահսկողություն իրականացնող տեսչական մարմինը իրավասու է ընդունել որոշում՝ ամբողջովին կամ մասնակիորեն դադարեցնելու կազմակերպությունների, արտադրական տեղամասերի, առանձին ագրեգատների աշխատանքը, շենքերի, շինությունների շինարարության, վերակառուցման, վերականգնման, ուժեղացման, արդիականացման աշխատանքները, ինչպես նաև շենքերի և շինությունների և այլ օբյեկտների շահագործումը հրդեհային անվտանգության նորմատիվ փաստաթղթերի պահանջների այն խախտումների դեպքում, որոնք անմիջականորեն և ուղղակի սպառնալիք են ստեղծում հրդեհների առաջացման և (կամ) մարդկանց անվտանգության համար:
Վկայակոչված իրավակարգավորումների և դրանց արդյունքում կատարված իրավական վերլուծությունների լույսի ներքո ուսումնասիրելով վարչական վարույթի նյութերը, հարկ է արձանագրել, որ Տեսչական մարմնի մասնագետների կողմից ՀՀ, Գեղարքունիքի մարզ, քաղաք Գավառ, Հենրիկ Աբրահամյան թիվ 7 հասցեում շահագործվող բենզալցակայանում արձանագրվել են այնպիսի խախտումներ, որոնց համակցությունը ստեղծում է անմիջական և ուղղակի սպառնալիք հրդեհների առաջացման և մարդկանց անվտանգության համար:
Նշված խախտումների համադրությամբ հնարավոր հրդեհների դեպքում անկասկած կստեղծվի հանրության համար վտանգավոր արտակարգ իրավիճակ՝ դրանից բխող բոլոր ծանր հետևանքներով, որը կսպառնա ոչ միայն տվյալ շենք-շինություններում աշխատանք կատարողների կամ տարածքում գտնվող սպառողների, այլ նաև առնվազն 25 մետր շառավղով գտնվող բնակելի և հասարակական շինություններում գտնվող մարդկանց կյանքին, առողջությանը և գույքին։ Հրդեհի առաջացման դեպքում վիճակը առավելապես կսրվի, ելնելով այն հանգամանքից, որ տարողությունները վերգետնյա են և մեծ քանակությամբ վառելիք թափվելու և տարբեր ուղղություններով ծորալու պարագայում կստեղծվեն լրացուցիչ վտանգներ հարևանությամբ գտնվող մարդկանց կյանքի և առողջության համար։ Ավելին, տարածքը սարքավորված չէ հրդեհի ազդանշանման ինքնաշխատ համակարգով, շանթարգելման համակարգով, հրդեհավտանգ հիմնատարերով տանիքի վրայով օդային էլեկտրահաղորդման գծեր, հրդեհի տագնապի ազդանշանը չի փոխանցվում լիազոր մարմնին։
Հաշվի առնելով նաև այն հանգամանքը, որ մինչև խախտումների վերացումը, առկա խախտումներով օբյեկտի շահագործումը հղի է հանրությանը սպառնացող անդառնալի հետևանքների առաջացման ողջամիտ ռիսկով, անհրաժեշտություն է առաջացել անհապաղ ընդունել վարչական ակտ՝ Ընկերության կողմից ՀՀ, Գեղարքունիքի մարզ, քաղաք Գավառ, Հենրիկ Աբրահամյան թիվ 7 հասցեում շահագործվող բենզալցակայանի շահագործումն ամբողջությամբ դադարեցնելու վերաբերյալ։
Հարկ է արձանագրել, որ վերոգրյալ հիմնավորումների ներքո սույն որոշումը ենթակա է անհապաղ կատարման, որը նման պայմաններում ինքնանպատակ չէ, այլ ելնելով հանրային շահից՝ հետագայում հանրության համար հնարավոր վտանգի առաջացման կանխարգելման միջոց։ Տվյալ պարագայում Ընկերության իրավունքի սահմանափակումը համաչափ է, քանի որ դրանից օգուտն ընդհանուր շահի համար ավելի մեծ է, քան վնասը հակասության մեջ գտնվող այլ բարիքներին կամ արժեքներին: Անձի իրավունքների կամ ազատությունների սահմանափակումը պետք է համաչափ լինի հակակշիռ հանրային շահերի պաշտպանության նպատակին: Ընկերության իրավունքների սահմանափակումը առկա իրավիճակում համաչափ է, հավասարակշռված, իսկ հանրային շահի օգուտը և պաշտպանությունը գերակշիռ է։
Հակառակ պարագայում, կարող է վտանգվել հանրության շահի և այլոց հիմնական իրավունքների և ազատությունների պաշտպանությունը։
Ուստի, մինչև հայտնաբերված խախտումների վերացումը, ՀՀ, Գեղարքունիքի մարզ, քաղաք Գավառ, Հենրիկ Աբրահամյան թիվ 7 հասցեում գտնվող բենզալցակայանի շահագործումն ենթակա է ամբողջությամբ դադարեցման։
«Վարչարարության հիմունքների և վարչական վարույթի մասին» օրենքի 20-րդ հոդվածի 5-րդ մասի համաձայն՝ անմիջական սպառնացող վտանգը կանխելու կամ արդեն իսկ առաջացած վտանգի հետևանքները վերացնելու, ինչպես նաև օրենքով նախատեսված այլ դեպքերում վարչական վարույթը կարող է սահմանափակվել միայն եզրափակիչ փուլով:
«Վարչարարության հիմունքների և վարչական վարույթի մասին» օրենքի 38-րդ հոդվածի 3-րդ մասի «ա» կետի համաձայն՝ լսումներ չեն անցկացվում, եթե անհրաժեշտություն է առաջանում անհապաղ ընդունելու վարչական ակտ, քանի որ հապաղումը կարող է հանգեցնել հանրության համար որևէ վտանգի առաջացման։
Ելնելով վերոգրյալից և ղեկավարվելով «Վարչարարության հիմունքների և վարչական վարույթի մասին» օրենքի 58-րդ հոդվածի 1-ին մասով, 78-րդ, 83-րդ հոդվածներով, «Հրդեհային անվտանգության մասին» օրենքի 20-րդ հոդվածի 2-րդ մասի 6-րդ կետով՝
ՈՐՈՇԵՑԻ
1. Ամբողջությամբ դադարեցնել ՀՀ, Գեղարքունիքի մարզ, քաղաք Գավառ, Հենրիկ Աբրահամյան թիվ 7 հասցեում գտնվող օբյեկտի փաստացի բենզալցակայան շահագործումը՝ մինչև հայտնաբերված խախտումների վերացումը։
2. Ամբողջությամբ դադարեցնել ԱՐՍԵՆ ՍԵՐՅՈԺԱՅԻ ՀԱՅՐԱՊԵՏՅԱՆԻ անհատ ձեռնարկատիրոջ (ՀՎՀՀ՝ 74321388 աշխատանքները ՀՀ, Գեղարքունիքի մարզ, քաղաք Գավառ, Հենրիկ Աբրահամյան թիվ 7 հասցեում՝ մինչև հայտնաբերված խախտումների վերացումը
3. Դատարկել և չեզոքացնել պահեստարաններում առկա վառելիքը։
4. Սույն որոշման 1-ին, 2-րդ և 3-րդ կետերի պահանջների կատարումն ապահովել անհապաղ՝ ելնելով հանրային շահից։
5. Պետության և հանրության շահերի, ինչպես նաև անձանց իրավունքների արդյունավետ պահպանման անհրաժեշտությունից ելնելով՝ սույն որոշումը հրապարակել Հայաստանի Հանրապետության հրապարակային ծանուցումների պաշտոնական ինտերնետային http://www.azdarar.am/ հասցեում գտնվող կայքում։
6. Որոշումը կամովին չկատարվելու դեպքում այն ենթակա է հարկադիր կատարման՝ «Դատական ակտերի հարկադիր կատարման մասին» Հայաստանի Հանրապետության օրենքով սահմանված կարգով:

ՏԵՍՉԱԿԱՆ ՄԱՐՄՆԻ ՂԵԿԱՎԱՐ
ԳԱՐԵԳԻՆ ԽԱՉԱՏՐՅԱՆ
Երևան





Ծանոթություն. «Վարչարարության հիմունքների և վարչական վարույթի մասին» օրենքի 74-րդ հոդվածի 1-ին մասի բ կետի համաձայն՝ որոշման դեմ վարչական բողոք բերելը չի կասեցնում դրա կատարումը։
Սույն որոշումը կարող է բողոքարկվել այն սահմանված կարգով հանձնելու (հանձնված համարվելու) օրվանից հետո՝ երկամսյա ժամկետում Տեսչական մարմին կամ ՀՀ վարչական դատարան:

Հասցե` Երևան, Դավթաշեն 4-րդ թաղամաս, Ա. Միկոյան 109/8

Հեռ..` 060708510

Էլ. փոստ`